पुणे : रिपब्लिकन पार्टी ऑफ इंडियातर्फे (आठवले गट) आयोजित राज्यव्यापी अधिवेशनाची तयारी अंतिम टप्प्यात आली आहे. एसएसपीएमएसच्या मैदानावर होणाऱ्या या अधिवेशनासाठी भव्य मंडप उभारला जात असून, राज्यभरातून लाखो रिपब्लिकन कार्यकर्ते २७ मे २०१८ रोजी पुण्यात दाखल होत आहे. रविवारी सायंकाळी चार वाजता केंद्रीय राज्यमंत्री आणि रिपब्लिकन पक्षाचे राष्ट्रीय अध्यक्ष रामदास आठवले कार्यकर्त्यांना मार्गदर्शन करणार आहेत.

याबाबत माहिती देताना रिपब्लिकन पक्षाचे महाराष्ट्र सचिव बाळासाहेब जानराव म्हणाले, २०१९च्या लोकसभा आणि विधानसभा निवडणुकीच्या पार्श्वभूमीवर होत असलेले हे अधिवेशन यशस्वी करण्यासाठी रिपब्लिकन पक्षाच्या कार्यकर्त्यांनी कंबर कसली आहे. शहराच्या विविध भागात कोपरा सभा, बैठका घेऊन अधिवेशनाबाबत जागृती केली जात आहे. लोकांच्या सोयीसाठी विभागावर बस व्यवस्था करण्यात आली आहे. तसेच कार्यक्रमाच्या ठिकाणी आरोग्य सुविधा, भोजनव्यवस्था, स्वच्छतागृहे उपलब्ध करून दिली जाणार आहेत. कोणत्याही कार्यकर्त्याची गैरसोय होऊ नये, यासाठी पुरेपूर काळजी घेतली जात आहे.’

अधिक माहिती देताना जानराव पुढे म्हणाले, ‘व्यासपीठाला दिवंगत उपमहापौर नवनाथ कांबळे यांचे नाव देण्यात आले आहे, तर स्वागत कमानींवर नामदेव ढसाळ, प्रा. रामनाथ चव्हाण, ज्येष्ठ साहित्यिक गंगाधर पानतावणे आणि लतिका साठे यांची नावे देण्यात आली आहेत. रविवारी सकाळी देशभरातून आलेल्या रिपब्लिकन पक्षाच्या प्रमुख नेत्यांचे अल्पबचत भवन येथे संमेलन होणार आहे. पक्षाची भविष्यातील वाटचाल आणि आगामी निवडणुकीतील भूमिका यावर विचारमंथन होणार आहे.’

‘या अधिवेशनाचे उद्घाटन केंद्रीय राज्यमंत्री रामदास आठवले यांच्या हस्ते होणार आहे. या प्रसंगी पालकमंत्री गिरीश बापट, राज्यमंत्री दिलीप कांबळे, खासदार अनिल शिरोळे, संजय काकडे, महापौर मुक्ता टिळक, उपमहापौर डॉ. सिद्धार्थ धेंडे यांच्यासह इतर अनेक मान्यवर उपस्थित राहणार आहेत,’ असेही जानराव यांनी सांगितले.

अधिवेशनाविषयी :
दिवस : रविवार, २७, मे २०१८
वेळ : सायंकाळी चार वाजता
स्थळ : एसएसपीएमएसचे मैदान, पुणे